Il-Kunsill Ewropew tat-8 ta' Frar 2013 laħaq qbil dwar il-qafas finanzjarju pluriennali (QFP) li jmiss, li jiddefinixxi l-prijoritajiet baġitarji tal-UE għas-snin 2014-2020. F'konformità mal-isforzi ta' konsolidazzjoni fl-Istati Membri, il-mexxejja tal-UE qablu li jnaqqsu, meta mqabbel mal-QFP attwali għall-2007-2013, ir-riżorsi finanzjarji li l-UE tista' timmobilizza. Madanakollu, sabiex jissaħħu t-tkabbir u l-impjiegi, żdiedu l-fondi għar-riċerka, l-innovazzjoni u l-edukazzjoni.
Il-mexxejja qablu wkoll dwar inizzjattiva ġdida maħsuba biex tindirizza l-isfida urġenti tal-qgħad fost iż-żgħażagħ.
Sabiex il-QFP l-ġdid jidħol fis-seħħ f'Jannar 2014 għad irid jintlaħaq qbil finali mal-Parlament Ewropew.