Il-Kunsill huwa pilastru deċiżjonali essenzjali għall-Unjoni Ewropea
Il-Kunsill jadotta, fil-biċċa l-kbira mal-Parlament Ewropew, atti li jaffettwaw direttament il-ħajja taċ-ċittadini u li għandhom impatt internazzjonali konsiderevoli.
Il-Kunsill huwa l-istituzzjoni tal-Unjoni fejn għandhom is-siġġu tagħhom ir-rappreżentanti tal-gvernijiet tal-Istati Membri, jiġifieri l-ministri ta' kull Stat Membru kompetenti f'qasam partikolari. Il-kompożizzjoni tal-laqgħat tal-Kunsill u l-frekwenza tagħhom ivarjaw skont is-suġġetti ttrattati. Pereżempju, il-Ministri tal-Affarijiet Barranin jiltaqgħu madwar darba fix-xahar fil-Kunsill Affarijiet Barranin. Bl-istess mod, il-Ministri tal-Ekonomija u l-Finanzi jiltaqgħu darba fix-xahar waqt il-Kunsill li jittratta l-Affarijiet Ekonomiċi u Finanzjarji, magħruf bħala l-Kunsill Ecofin.
Hemm għaxar konfigurazzjonijiet tal-Kunsill, li jkopru l-linji politiċi kollha tal-Unjoni. Il-Kunsill Affarijiet Ġenerali, magħmul ġeneralment mill-Ministri tal-Affarijiet Barranin jew il-Ministri tal-Affarijiet Ewropej, jiżgura l-koerenza tal-ħidmiet tad-diversi konfigurazzjonijiet tal-Kunsill u jħejji l-laqgħat tal-Kunsill Ewropew.
Il-kompiti tal-Kunsill
- Jadotta atti leġislattivi (regolamenti, direttivi, eċċ), fil-biċċa l-kbira b' "kodeċiżjoni" mal-Parlament Ewropew;
- Jikkontribwixxi għall-koordinazzjoni tal-linji politiċi tal-Istati Membri. Dan hu l-każ, pereżempju, fil-qasam ekonomiku;
- Jiżviluppa l-politika estera u ta' sigurta komuni, abbażi tal-linji strateġiċi stabbiliti mill-Kunsill Ewropew;
- Jikkonkludi, f'isem l-Unjoni, ftehimiet internazzjonali;
- Jadotta, flimkien mal-Parlament Ewropew, il-baġit tal-Unjoni.
Il-Kunsill bħala leġislatur
Il-Kunsill, flimkien mal-Parlament Ewropew, huwa l-leġislatur tal-Unjoni. Fil-maġġoranza tal-każijiet, il-Kunsill ma jistax jilleġisla ħlief fuq il-bażi ta' proposti li tippreżentalu l-Kummissjoni Ewropea. Huwa jista' jitlob lill-Kummissjoni tippreżentalu kwalunkwe proposta li tkun meħtieġa. Mindu daħal fis-seħħ it-Trattat ta' Lisbona, miljun ċittadin ukoll jistgħu, bil-firma tagħhom, jistiednu lill-Kummissjoni tippreżenta proposta. Dan huwa d-dritt ta' inizjattiva taċ-ċittadini.
In-numru ta' voti ta' kull Stat Membri huwa stabbilit mit-Trattati. It-Trattati jiddefinixxu wkoll il-każijiet fejn jinħtieġu l-maġġoranza sempliċi, il-maġġoranza kwalifikata jew l-unanimità.
Il-Kunsill jiltaqa' fil-pubbliku meta jiddelibera u jivvota fuq proposta ta' att leġislattiv jew waqt li jkun għaddej dibattitu ġenerali. Tista' ssegwi din il-ħidma f'ħin reali fuq is-sit Internet tal-Kunsill (video.consilium.europa.eu) u tara pereżempju kif il-Ministru tiegħek jesprimi l-pożizzjoni ta' pajjiżek. Id-dokumentazzjoni bil-miktub li jkollhom il-Ministri hija wkoll aċċessibbli għal kulħadd.
Min-naħa l-oħra, id-dibattiti fl-oqsma mhux leġislattivi, bħal pereżempju fil-qasam tal-affarijiet barranin, mhumiex pubbliċi. Iżda s-sessjonijiet tal-Kunsill huma dejjem segwiti b'konferenza stampa u b'komunikazzjoni li tispjega d-deċiżjonijiet meħuda.
Maġġoranza kwalifikata tintlaħaq jekk jiġu sodisfatti dawn iż-żewġ kondizzjonijiet:
- maġġoranza tal-Istati Membri tagħti l-approvazzjoni tagħha (f'ċerti każijiet maġġoranza ta' żewġ terzi);
- minimu ta' 255 vot huwa espress favur il-proposta, minn total ta' 345 vot.
Barra minn hekk, kull Stat Membru jista' jitlob il-konferma li l-voti favorevoli jirrappreżentaw mill-inqas 62% tal-popolazzjoni totali tal-Unjoni. Jekk dan il-kriterju ma jiġix irrispettat, id-deċiżjoni ma tiġix adottata.
| Tqassim ta' voti għal kull Stat |
| Ġermanja, Franza, Italja, Renju Unit |
29 |
| Spanja, Polonja |
27 |
| Rumanija |
14 |
| Pajjiżi Baxxi |
13 |
| Belġju, Repubblika Ċeka, Greċja, Ungerija, Portugall |
12 |
| Awstrija, Bulgarija, Svezja |
10 |
| Danimarka, Irlanda, Litwanja, Slovakkja, Finlandja |
7 |
| Ċipru, Estonja, Latvja, Lussemburgu, Slovenja |
4 |
| Malta |
3 |
| TOTAL |
345 |
Wettaq simulazzjoni tal-possibbiltajiet differenti ta' votazzjoni u skopri r-riżultati miksuba bl-għajnuna ta' sistema ta'
kalkulazzjoni ta' voti
Il-Presidenza tal-Kunsill
Ordni ta' rotazzjoni tal-Presidenzi
DEĊIŻJONI TAL-KUNSILL tal-1 ta' Jannar 2007 li tistabbilixxi l-ordni tal-eżerċizzju tal-Presidenza tal-Kunsill
Għal aktar tagħrif
Il-Kunsill huwa ppresedut fuq bażi ta' rotazzjoni mis-27 Stat Membru tal-Unjoni, għal perijodu ta' sitt xhur kull wieħed. Matul dawn is-sitt xhur, il-Presidenza tmexxi l-laqgħat fil-livelli kollha, tipproponi d-direzzjonijiet u tfassal il-kompromessi meħtieġa biex jittieħdu d-deċiżjonijiet fil-Kunsill.
Biex jiżguraw il-kontinwità tal-ħidma tal-Kunsill, il-presidenzi ta' kull sitt xhur jikkooperaw mill-qrib fi gruppi ta' tlieta. It-"trio" tal-presidenzi jfassal programm konġunt tal-attivitajiet tal-Kunsill għal perijodu ta' 18-il xahar.
Konfigurazzjoni waħda biss tal-Kunsill mhijiex ippreseduta mill-presidenza ta' sitt xhur: il-Kunsill Affarijiet Barranin li, mid-dħul fis-seħħ tat-Trattat ta' Lisbona, huwa ppresedut mir-Rappreżentant Għoli tal-Unjoni għall-Affarijiet Barranin u l-Politika ta' Sigurtà. Mill-1 ta' Diċembru 2009 s-Sinjura Catherine Ashton qed tokkupa din il-kariga. Madwar għoxrin grupp ta' ħidma fil-qasam tal-affarijiet barranin huma ppreseduti wkoll minn president fiss, maħtur mir-Rappreżentant Għoli.